Take a fresh look at your lifestyle.

ಏನಿದು ಕಾರ್ಮಿಕ ಕಾಯ್ದೆಗಳ ತಿದ್ದುಪಡಿ ?

ದೇಶದಲ್ಲಿ ಇಂದು ಕಾರ್ಮಿಕ ಕಷ್ಟ ಹೇಳತೀರದ್ದು

0
post ad

ದೇಶದಲ್ಲಿ ಇಂದು ಕಾರ್ಮಿಕ ಕಷ್ಟ ಹೇಳತೀರದ್ದು, ಕೈಗಾರಿಕಾ ಕ್ರಾಂತಿಗೆ ಮುನ್ನ ಇದ್ದ ಸ್ಥಿತಿಯಲ್ಲಿ ಇಂದು ಕಾರ್ಮಿಕ ಬದುಕು ಕಟ್ಟಿಕೊಳ್ಳುವತ್ತ ಹೆಜ್ಜೆ ಇಡುವಂತಾಗಿದೆ.
ದೇಶದ ಅನೇಕ ರಾಜ್ಯಗಳು ಕರೋನಾ ವಿರುದ್ಧ ಹೋರಾಡುವ ಹೆಸರಿನಲ್ಲಿ ಮೂರು ವರ್ಷಗಳ ವರೆಗೂ ಕಾರ್ಮಿಕ ಕಾನೂನುಗಳ ಅನೇಕ ನಿಬಂಧನೆಗಳನ್ನು ಅಮಾನತ್ತಿನಲ್ಲಿಡಲು ತೀರ್ಮಾನಿಸಿವೆ.
ಅಂದರೆ, ಕಾರ್ಮಿಕರ ಕಲ್ಯಾಣಕ್ಕಾಗಿ ರೂಪಿಸಿದ ಕಾನೂನುಗಳನ್ನು ಮೊಟಕುಗೊಳಿಸಿ ಕೈಗಾರಿಕೋದ್ಯಮಿಗಳು ಮತ್ತು ಆಡಳಿತ ಮಂಡಳಿಗಳಿಗೆ ವಿನಾಯಿತಿಗಳನ್ನು ನೀಡಿ ಕಾರ್ಮಿಕರ ಹಿತಾಸಕ್ತಿಯನ್ನು ಗಾಳಿಗೆ ತೂರಲು ಕೆಲ ರಾಜ್ಯ ಸರ್ಕಾರಗಳು ಪ್ರಯತ್ನಿಸುತ್ತದೆ ಎಂಬುದು ಜಗಜ್ಜಾಹಿರ.
ಇತ್ತೀಚೆಗೆ ಉತ್ತರ ಪ್ರದೇಶ ಸರ್ಕಾರ ಮಹತ್ವದ ನಿರ್ಧಾರ ತೆಗೆದುಕೊಂಡಿತ್ತು, ರಾಜ್ಯದಲ್ಲಿ ಬಂಡವಾಳ ಹೂಡಿಕೆ ಹೆಚ್ಚಿಸುವ ನೆಪ ಹೇಳಿ ಕಾರ್ಮಿಕ ಕಾಯ್ದೆಗಳನ್ನು, ನಿಬಂಧನೆಗಳನ್ನು ಅಮಾನತ್ತಿನಲ್ಲಿಟ್ಟಿದೆ..
ಅದೇನೆಂದರೆ, ಉತ್ತರ ಪ್ರದೇಶ ರಾಜ್ಯದಲ್ಲಿ ಕಾರ್ಮಿಕರಿಗೆ ಸಂಬಂಧಿಸಿದ ಮೂರು ಕಾನೂನುಗಳು ಮಾತ್ರ ಜಾರಿಯಲ್ಲಿರುತ್ತವೆ, ಉಳಿದ ಕಾನೂನುಗಳು ಮೂರು ವರ್ಷಗಳ ಕಾಲ ಜಾರಿಯಲ್ಲಿ ಇರುವುದಿಲ್ಲ.
ಜಾರಿಯಲ್ಲಿರುವ ಮೂರು ಕಾನೂನುಗಳೆಂದರೆ
೧. ಕಟ್ಟಡ ಕಾರ್ಮಿಕ ಕಾಯ್ದೆ,
೨.ಜೀತ ಪದ್ಧತಿ ವಿರೋಧಿ ಕಾರ್ಮಿಕ ಕಾಯ್ದೆ ಮತ್ತು ೩.ಕಾರ್ಮಿಕ ಪರಿಹಾರ ಕಾಯ್ದೆಯ ಐದನೇ ಶೆಡ್ಯೂಲ್

ಹನ್ನೆರಡು ಗಂಟೆಗಳ ಶಿಫ್ಟ್
ಬದಲಾದ ಪರಿಸ್ಥಿತಿಯಲ್ಲಿ ಕಾರ್ಮಿಕರು 12 ಗಂಟೆಗಳ ಪಾಳಿಯಲ್ಲಿ ಕೆಲಸ ಮಾಡಬೇಕಾಗುತ್ತದೆ.
ಹಿಮಾಚಲ ಪ್ರದೇಶ, ಪಂಜಾಬ್ ಮತ್ತು ಹರಿಯಾಣದಲ್ಲಿ ಕಾರ್ಮಿಕರು 8 ಗಂಟೆಗಳ ಬದಲಾಗಿ 12 ಗಂಟೆಗಳ ಶಿಫ್ಟ್ ಗಳಲ್ಲಿ ಕೆಲಸ ಮಾಡಬೇಕು ಎಂದು ತೀರ್ಮಾನಿಸಿವೆ.
ಅದೇ ರೀತಿ , ಮಧ್ಯಪ್ರದೇಶ ಸರ್ಕಾರವೂ ಸಹ ಸಾವಿರ ದಿನಗಳ ಕಾಲ ಕಾರ್ಮಿಕರ ಗುತ್ತಿಗೆ ಕಾನೂನನ್ನು ರದ್ದುಪಡಿಸಿದೆ. ಜೊತೆಗೆ ಕೈಗಾರಿಕಾ ವಿವಾದಗಳ ಕಾಯ್ದೆ ಮತ್ತು ಕೈಗಾರಿಕಾ ಸಂಬಂಧಗಳ ಕಾಯಿದೆಯನ್ನೂ ರದ್ದುಮಾಡಿದೆ.
ಮಧ್ಯಪ್ರದೇಶ ತೆಗೆದುಕೊಂಡ ಈ ನಿರ್ಧಾರವು ರಾಜ್ಯದಲ್ಲಿ ಅಸ್ತಿತ್ವದಲ್ಲಿರುವ ಕೈಗಾರಿಕಾ ಘಟಕಗಳು ಮತ್ತು ಹೊಸದಾಗಿ ತೆರೆಯಲಾದ ಘಟಕಗಳಿಗೆ ಅನ್ವಯಿಸುತ್ತದೆ.

ಮಾಲೀಕರ ಜವಾಬ್ದಾರಿ
ಕಾರ್ಮಿಕರು  ಕೆಲಸ ಮಾಡುವ ಪ್ರದೇಶವನ್ನು ಶುಭ್ರವಾಗಿ ಇಡುವುದು ಮಾಲೀಕರ ಜವಾಬ್ದಾರಿಯಾಗಿದೆ.  ಜೊತೆಗೆ,
ಕಾರ್ಮಿಕರಿಗೆ ಮೂಲ ಸೌಕರ್ಯ ಒದಗಿಸುವುದು ಅವರ ಕಾನೂನು ಬದ್ಧ ಜವಾಬ್ದಾರಿಯೂ ಹೌದು. ಆದರೆ, ಅದು ಇನ್ನು ಮುಂದೆ  ಇರುವುದಿಲ್ಲ.

ಕೈಗಾರಿಕೋದ್ಯಮಿಗಳ ಕಾಯ್ದೆಯ ಪ್ರಕಾರ  ಇಲ್ಲಿಯವರೆಗೂ ಅಂಗೀಕರಿಸಿಕೊಂಡು ಬರುತ್ತಿದ್ದ ಜವಾಬ್ದಾರಿಗಳಿಂದ  ಕೆಲ ರಾಜ್ಯ ಸರ್ಕಾರಗಳೇ ಉದ್ಯಮಿಗಳಿಗೆ ವಿನಾಯಿತಿಯನ್ನು ನೀಡಿವೆ.

ರದ್ದಾಗಿರುವ ಕೆಲವು ನಿಬಂಧನೆಗಳು:
ಇನ್ನು ಮೂರು ವರ್ಷಗಳ ಕಾಲ ರದ್ದಾಗಲಿರುವ ಕೆಲವು ನಿಬಂಧನೆಗಳು ಎಂದರೆ
೧. ಕಾರ್ಯಕ್ಷೇತ್ರ ಅಥವಾ ಕಾರ್ಖಾನೆಯಲ್ಲಿ  ನೈರ್ಮಲ್ಯತೆ ಇಲ್ಲದಿದ್ದರೂ ಮಾಲೀಕರಿಗೆ ಕಾನೂನಿ ನಿಬಂಧನೆಗಳು ಅನ್ವಯವಾಗುವುದಿಲ್ಲ.
೨. ಕೆಲಸದ ಸ್ಥಳದಲ್ಲಿ ಅಥವಾ ಗಾಳಿ ಹರಿಯುವ ಪ್ರದೇಶಗಳಲ್ಲಿ  ಗಾಳಿ-ಬೆಳಕು ಇಲ್ಲದಿದ್ದರೆ  ಆಡಳಿತ ವರ್ಗದ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳುವುದಿಲ್ಲ.
೩. ಕೆಲಸನಿಮಿತ್ತ ಯಾವುದೇ ಕಾರ್ಮಿಕರು ಅನಾರೋಗ್ಯಪೀಡಿತರಾಗಿದ್ದರೆ, ಕಾರ್ಖಾನೆ ವ್ಯವಸ್ಥಾಪಕರಿಗೆ ಅಥವಾ ಸಂಬಂಧಪಟ್ಟ ಅಧಿಕಾರಿಗೆ ಮಾಹಿತಿ ನೀಡುವ ಅಗತ್ಯವಿಲ್ಲ.
೪. ಶೌಚಾಲಯದ ವ್ಯವಸ್ಥೆ ಕಲ್ಪಿಸದಿದ್ದರೂ ಮಾಲೀಕರ ವಿರುದ್ಧ ಯಾವುದೇ ಕ್ರಮ ತೆಗೆದುಕೊಳ್ಳುವುದಿಲ್ಲ
೫.  ಆಯಾ ಘಟಕಗಳು ತಮ್ಮ ಅನುಕೂಲ ಮತ್ತು ಷರತ್ತುಗಳಿಗೆ ಅನುಗುಣವಾಗಿ ಕಾರ್ಮಿಕರನ್ನು ನೇಮಿಸಿಕೊಳ್ಳಬಹುದು ಮತ್ತು ವಜಾಮಾಡಬಹುದು.
೬. ಕಾರ್ಮಿಕರು   ದುಸ್ಥಿತಿಯಲ್ಲಿ ಕೆಲಸ ಮಾಡುತ್ತಿದ್ದರೂ ಕಾರ್ಮಿಕ ನ್ಯಾಯಾಲಯಗಳು ಅದನ್ನು ಕೇಳುವಂತಿಲ್ಲ, ಅದನ್ನು ಮತ್ತೊಂದು ನ್ಯಾಯಾಲಯದಲ್ಲಿ ಪ್ರಶ್ನಿಸುವಂತಿಲ್ಲ.

ಇದರ ಜೊತೆಗೆ, ನೂತನ ಕಂಪನಿಗಳು  ಇನ್ನು ಮುಂದೆ ಮಹಿಳಾ ಕಾರ್ಮಿಕರ ಮಕ್ಕಳು ಉಳಿದುಕೊಳ್ಳಲು, ಸ್ಥಳ ಅಥವಾ  ವಿಶ್ರಾಂತಿ ಪಡೆಯಲು  ಪ್ರತ್ಯೇಕ ಕೊಠಡಿ ವ್ಯವಸ್ಥೆ ಮಾಡುವುದು ಕಡ್ಡಾಯವಲ್ಲ. ಈ ಘಟಕಗಳ ಬಗ್ಗೆ ಯಾವುದೇ ಸರ್ಕಾರಿ ಸಮೀಕ್ಷೆಗಳು ಜಾರಿಯಲ್ಲಿರುವುದಿಲ್ಲ.
1984ರಲ್ಲಿ ಭೋಪಾಲ್ ಅನಿಲ ದುರಂತದ ನಂತರ ಮಧ್ಯಪ್ರದೇಶ ಸರ್ಕಾರ ಕಾರ್ಮಿಕರ ಕಲ್ಯಾಣ ನಿಧಿಯನ್ನು ಸ್ಥಾಪಿಸಿತ್ತು,  ಅದರಂತೆ ಪ್ರತಿ ವರ್ಷ ಪ್ರತಿ ಕಾರ್ಮಿಕನಿಗೆ 80 ರೂ.ಗಳನ್ನು ಠೇವಣಿ ಇಡುವುದನ್ನು ಕಂಪನಿಗಳು ಕಡ್ಡಾಯಗೊಳಿಸಿತ್ತು. ಈಗ ಈ  ನಿಯಮವನ್ನು ತೆಗೆದುಹಾಕಬೇಕೆಂದು ನಿರ್ಧರಿಸಲಾಗಿದೆ.
ಕೋವಿಡ್ ಕಾಲದ ನಂತರದಲ್ಲಿ ಬದಲಾದ ಸನ್ನಿವೇಶದಲ್ಲಿ ಉದ್ಯಮಿಗಳಿಗೆ ಲಾಭ ಮಾಡಲು ಕಾರ್ಮಿಕರನ್ನು ಬಲಿ ಕೊಡುವುದು ಎಷ್ಟು ಸಮಂಜಸ , ಕಾರ್ಮಿಕರನ್ನು ಜೀತಪದ್ಧತಿಯತ್ತ ತಳ್ಳುತ್ತಿರುವ  ಈ ಕ್ರಮಗಳು  ಮುಂದೆ ಯಾವ  ಕ್ರಾಂತಿಗೆ ಮುನ್ನಡಿ ಬರೆಯುತ್ತದೆಯೋ ಕಾದುನೋಡಬೇಕಾಗಿದೆ.